寵物家庭 (貓咪篇) — 必看室內設計！

作者: Karl Wong (ARTWOOD雅活室內設計)

香港愈黎愈多無子家庭，雖然無子，但佢地都有主子，就係佢地既寵物喇！近年，好多年輕夫婦唔生小朋友，選擇養寵物互相陪伴。對大部份人黎講，養得寵物，佢地就係家庭既一份子，呢個家就係大家既家。究竟係室內家居設計既層面，想要打造主子同奴才共融既理所家居，有乜野要注意既事項呢？有無諼陷陷阱呢？今日就同大家探討一下，寵物共融家區設計—貓咪篇。

1. 強調垂直空間

貓咪天生鐘意攀爬，所以係室內設計入面，創造垂直空間係非常重要架！常見既造法有係牆上安裝書架、貓跳台或貓爬架，咁樣就可以令貓咪有更多既活動空間，滿足到貓咪既好奇心之餘，仲可以提供一個安全既位置俾主子「居高臨下」咁監督住奴才，真係心情都靚Ｄ架！但係係設計呢類空間既時候，要確保它們穩固安全，並考慮到貓咪上下跳躍既便利性。最後，當然係揀返適合家居裝修風格既設計同材質，令整體空間又實用又靚喇！

2. 使用耐磨且易清潔的材質

貓咪既爪子同毛髮可能會整爛或整污糟屋企既傢俬，因此係室內設計既時候，選擇家俬用料應該要考慮到佢既耐用性同易於清潔既特性。係梳化選擇上，應該以寵物布為主，呢種寵物布不易被抓爛，而且易於擦拭，係打造貓咪共融家居既一大神器。針對貓咪磨意磨爪既習性，可以提供專用既磨爪板貼係貓咪抓到既矮櫃面，咁樣就可以保護家具既同時，又能滿足貓咪既需求。

3. 設計安全的窗戶和陽台

貓咪鍾意觀察外面既世界，但窗戶同露台可能對佢地構成安全隱患。因此，係設計家居時，首先要確保安全性。例如，可以安裝堅固既窗網或陽台護欄，防止貓咪意外墜落。現時坊間流行高清防蚊貓網，係確保安全既同時又防蚊，仲可以兼顧埋美觀，一舉兩得！另外係窗口旁邊，可以設置貓咪專用既觀景台或窗台座椅，等它地可以安全咁享受外面既風景，咁樣既設計唔單只能保保護貓咪既安全，佢地成日係屋企流流長都唔會悶親呀嘛！

4. 整潔無味的如廁空間

每隻貓咪需要至少一個專用既貓砂盤作為去廁所既地方，但香港室內設計既時候好少將呢一點放入設計入面，最後只好是但搵個牆角放貓砂盤，唔單只難於打理，仲經常傳出臭味！其實，廁所係最適合貓咪去廁所既地方，廁所空間隱密安全，清潔時亦都十分便利，但要注意廁所內必須保持乾爽，貓砂先唔會受潮，因此係室內設計時預留空間，並且做到乾濕分離係十分重要，貓咪出出入入都要方便，係廁所門上開一個由裡面鎖既細貓門，就唔洗成日打開對廁所門喇！

5. 避免使用地台

除左少數貓咪品種之外，大多數貓咪都會吐毛，就算貓咪平時再乖，只會去貓砂盤去廁所，都避免唔到佢地吐毛時會整污糟屋企地面。香港吋金呎土，好多時候做室內設計時都會考慮用地台去增加儲物空間。確實地台可以增加唔少空間，但地台櫃同櫃之間既空隙好容易藏污，塵同貓毛好容易係入面堆積，如果貓咪不幸係上面吐毛甚至嘔吐既話，呢類微縫就極難清潔，最壞情況仲會吸引小昆蟲黎添丫！